Алматыдағы панфиловшылар саябағында мерекелік шара өтті
Отан қорғаушылар күніне арналған мерекелік шара 28 гвардияшы-панфиловшылар саябағында өтті, деп хабарлады ҚазАқпарат.
Алматы, NEGE. Даңқ мемориалына жүздеген әскери және ішкі істер органдарының қызметкерлері, сондай-ақ олардың жұбайлары, балалары мен ата-аналары келді.
Алаңға түрлі соғысқа қатысқан ардагерлер, қазіргі Отан қорғаушылар және әлі оқып жүрген жас жауынгерлер жиналды.
Ұйымдастырушылар Отан қорғаушылар күні мен Жеңіс күнінің жақындығы ұрпақтар сабақтастығын бейнелейтінін атап өтті.Сондай-ақ ішкі істер, қорғаныс, төтенше жағдайлар органдарының еңбегімен ерекше көзге түскен қызметкерлері алғыс хатпен марапатталды.
Марапатты қала әкімінің орынбасары Арман Қырықбаев тапсырды.
Мерекенің ресми бөлігі Сағадат Нұрмағамбетов атындағы Құрлық әскерлері әскери институтының курсанттарының қару-жарақпен саптық жаттығуларымен аяқталды.Бұдан соң отандық эстрада жұлдыздарының қатысуымен мерекелік концерт басталды.
Отан қорғаушыларға Il Canto вокал квартеті, Бағдат Әбдірайымов, Толқын Забирова, Жәмила Серкебаева өнер көрсетті.