Алматыдағы «Қайрат» шағын ауданының тұрғындары жылусыз қалды
Алматы әкімдігі аудандағы газдың тоқтатылуына қатысты пікір білдірді.
Алматы, NEGE. Жол көлік оқиғасы салдарынан істен шыққан «Қайрат» шағын ауданындағы «Баймақ» ЖШС жеке газ желілерінің зақымдануы бойынша жөндеу мәселесі жедел шешілуде. Кеше сағат 13:30-да жүк көлігінің жүргізушісі орташа қысымды газ магистраліне соқтығысып, апат салдарынан шағын ауданның бірқатар үйлеріне газ беру тоқтатылған болатын.
«Апатты қалпына келтіру жұмыстары 3 сағаттан астам уақытқа созылды, содан соң желілерді іске қосу-жөндеу жұмыстары басталды. Алайда жөндеу бригадалары газбен тұрақты жабдықтауды толық көлемде қамтамасыз ете алмады», - деді Алматы әкімдігінің баспасөз қызметі.
Аудан әкімдігі мен «ҚазТрансГаз Аймақ» АҚ қызметкерлері шағын аудан тұрғындарымен кездесіп, түсіндіру жұмыстарын жүргізді әрі үйлерді аралап шықты. 1: 30-да 135 абонент газбен қамтамасыз етілді.
«Қалған 52 абонент бойынша желілерде газ құбырларының бітелуі анықталды, оларды жою үшін негізгі магистральды ажырату қажет болды (қауіпсіздік техникасына сәйкес түнгі уақытта дәнекерлеу және іске қосу-жөндеу жұмыстары жүргізілмейді)», - деп хабарлады Алматы әкімдігінің баспасөз қызметі.
