Алматыдағы 2,2 млрд теңгелік коттедждің кімге тиесілі болғаны анықталды
Алматы қаласының Мемлекеттік активтер басқармасы аукционға шығарған құны 2,2 млрд теңге болатын коттедж бұған дейін Нұргүл Ертаеваның меншігінде болған.
Астана, NEGE. Бұл туралы Алматы қаласының әкімдігі хабарлады.
«Алматы қаласы Алмалы аудандық сотының 2024 жылғы 5 қаңтардағы қаулысын орындау мақсатында, Алматы қаласы, Бостандық ауданы, Мирас шағын ауданы, 188-үй мекенжайында орналасқан тәркіленген жылжымайтын мүлік нысаны Ертаева Н.А.-дан қаланың коммуналдық меншігіне қабылданды.
Жекешелендіру объектілерін сату қағидаларының 96-тармағына сәйкес, коммуналдық меншік объектілерін жекешелендіруден түскен қаражат жергілікті бюджетке бағытталады», – делінген баспасөз қызметінің хабарламасында.
Сот кабинеті деректеріне сәйкес, 2024 жылғы 5 қаңтарда Нұргүл Алдашқызы Ертаеваға қатысты іс сот өндірісінде болған. Ол – Bank RBK-тен 144 млрд теңге жымқыру ісі бойынша сотталған банкир Жомарт Ертаевтың жұбайы. Кейбір мәліметтерге қарағанда, олар ажырасқан.
Еске сала кетейік, тәркіленген жеке бассейні бар үй әл-Фараби даңғылынан жоғары орналасқан. Жақын маңында Тұңғыш Президент саябағы, «Жайлау» гольф-клубы және жекеменшік білім беру мекемелері, соның ішінде халықаралық «Мирас» мектебі бар.
