Алматыда ұшақтар кешігіп ұшты
Air Astana әуе компаниясы Алматы-Анталия, Алматы-Сеул, Алматы-Ташкент бағытындағы рейстердің, сондай-ақ Ақтөбе мен Қызылордаға ұшатын ішкі рейстердің кешігу себептеріне қатысты түсініктеме берді.
Алматы, NEGE. Кеше Анталияға ұшуы тиіс Boeing 767 ұшағындағы техникалық ақауға байланысты тізбекті кешігу болған. Салдарынан 223 жолаушы бір тәулік бойы ұша алмады. Соның 166-сы бүгін Түркияға аттанып кетті.
Тілек Әбдірахимов, Air Astana корпоративтік байланыстар бойынша менеджері:
– Бүгінге ауыстырылған кешегі рейс жергілікті уақыт бойынша сағат 10.55-те ұшты. Ал бүгінгі 9:40-қа жоспарланған рейс 12:55-те көкке көтерілді. Әуе кемесінің сыйымдылығы аз кішірек ұшаққа ауыстырылуына байланысты жолаушылардың бір бөлігі ертең Нұр-Сұлтан арқылы, бір бөлігі Алматы-Анталия рейсімен жөнетілді. Өтемақы алу үшін help.air astana.com сайтына хабарласыңыз. Air Astana ұшақтардың кешігіп ұшқаны үшін кешірім сұрайды.