Алматыда коронавирус жұқтырған балалардың саны артты
Алматыда кейінгі екі аптада эпидемиологтар жүргізген талдауларға сәйкес, еңбекке қабілетті азаматтардың коронавирусты жиі жұқтыратыны анықталды.
Алматы, NEGE. Бұл туралы брифингте қалалық санитарлық-эпидемиологиялық бақылау департаменті басшысының орынбасары Әсел Қалықова мәлімдеді. Оның сөзінше, 20 мен 39 жас аралығындағы азаматтар коронавирус инфекциясын жұқтыруға бейім.
«14 жасқа дейінгі балалар арасында ауру көрсеткіші 3,3%-ке өсті. Олар мектептер пен отбасыда инфекция жұқтырған. Көбінесе 20-39 жастағы азаматтар коронавирус инфекциясын жұқтырады, олардың үлесі – 28%, 40-59 жастағылар – 22% және 60 жастан асқан адамдар – 23%», – деді Қалықова.
Ол сондай-ақ алматылықтардың вирусты сауда нысандары, қоғамдық көліктер мен отбасы ішінде жиі жұқтыратынын мәлімдей келе, коронавирус жұқтыру деректері жиілеген жерлерді атады. Айтуынша, сауда орындарында, азық-түлік дүкендерінде, метро мен қоғамдық тамақтану орындарында, монша, саунада, дәріхана, демалыс орындарында ауру жұқтыратындар саны артқан.