Алматыда кәсіби шеберліктің VIII өңірлік чемпионаты аяқталды
WorldSkills Almaty чемпионаты қорытындыланды, деп хабарлайды Алматы әкімдігінің баспасөз қызметі.
Алматы, NEGE. Алматыда кәсіби шеберліктің VIII өңірлік чемпионаты аяқталды. 165 жеңімпаз 50 000-нан 150 000 теңгеге дейінгі ақшалай сертификатпен және дипломмен марапатталды.
Сонымен қатар, жүлдегерлер мен жеңімпаздар қаланың жетекші компанияларына кепілді жұмысқа орналасуға «алтын сертификаттар» алды. Жарысқа қатысушылар үшін биыл құзыреттер саны 53-ке артты.
Оның ішінде кірпіш қалау, сантехника және жылыту, инженерлік графика, автокөлік жөндеу, бизнеске арналған ІТ шешімдер және тағы басқалары бар. Чемпионаттың мақсаты жұмысшы мамандықтарының беделін арттыру және шеберлік дағдысын дамыту. Бұл елдегі техникалық және кәсіптік білімнің дамуына да ықпал етеді.
«Алматы қаласының колледждері тағы да WorldSkills халықаралық қозғалысын дамытуға бейілділігін көрсетті, ал чемпионат алаңдарындағы қатысушылардың өздері өздерін өз ісінің нағыз кәсіпқойлары ретінде көрсетті. Чемпионаттың мақтанышы Deafskills бағытындағы сайыскерлер болды, олар бізге рухтың күші мен кез келген қиындықты жеңуге деген ұмтылысын көрсетті», - деді Алматы қаласы әкімінің орынбасары Әсем Нүсіпова.
Байқау жеңімпаздары WorldSkills Kazakhstan 2023 республикалық чемпионатына қатысады.
Естеріңізге сала кетейік, Алматыда қала колледждерінің 21 алаңында WorldSkills Almaty – 2023 өңірлік кәсіби шеберлік чемпионаты 6 сәуірден басталған болатын.
Ұйымдастырушылар: Алматы қаласының білім басқармасы және «WorldSkills Almaty» ұйымдастыру комитеті
