Алматыда қар тазалауға 1500 жұмысшы тартылды
Алматыда таңнан бастап толассыз жауған қар 5-6 см, таулы аймақтарда 20 см-ге жетті, деп хабарлайды ҚазАқпарат.
Алматы, NEGE. Көктайғақтың алдын алу үшін қар жауған кезден бастап жолдарға, қиылыстар мен жолайрықтардың кіреберістеріне, тау бөктері мен таулы аймақтарға көктайғаққа қарсы материал себіліп, қар тазаланды. Көктайғаққа қарсы 2350 тонна материал пайдаланылды. Тротуарларды, жаяу жүргіншілер аймақтарын, қоғамдық көлік аялдамаларын, автотұрақ қалталарын, жер үсті өткелдерін және ортақ пайдаланылатын жерлерді тазарту жұмыстары жүргізіліп жатыр. Таңертеңгі қар тазалауға 552 арнайы техника, оның ішінде 178 құмлақтырғыш пен 1134 жұмысшы жұмылдырылған. Түнгі уақытта 509 арнайы техника, оның ішінде 171 құмлақтырғыш, сондай-ақ 400-ге жуық жұмысшы шығады деп көзделіп отыр. Аудандық әкімдіктер мен қала әкімдігінде қар тазалау жұмыстарын тәулік бойы бақылайтын кезекшілік ұйымдастырылған. Қазгидрометтің болжамы бойынша, 17 наурызға дейін ауық-ауық жаңбыр мен қар аралас жауын-шашын күтілуде.