Алматыда ірі энергонысандар бой көтереді
Алматы қалалық энергетика және сумен жабдықтау басқармасының басшысы Санжар Алин шаһардың жылыту маусымға дайындық барысын баяндады.
Алматы, NEGE. Электрмен сенімді жабдықтауды қамтамасыз ету мақсатында басқарма 10 жобаны Алатау, Жетісу, Медеу және Түрксіб аудандары бойынша жүзеге асыруда. Оның ішінде биыл 4 жоба, қалған жобалар 2023 жылы аяқталады.
«Қазір ірі энергонысандар салынып жатыр. 400 мың тұтынушыны қамтитын екі қосалқы станцияның – «Алмагүл» және «Тұздыбастаудың» құрылысы ірі объектілердің бірі. «Алмагүл» қосалқы станциясының құрылысын жыл соңына дейін, ал «Тұздыбастау» қосалқы станциясының құрылысын келесі жылдың шілдесіне дейін аяқтау жоспарланып отыр», – деді С. Алин.
Алатау және Бостандық аудандарында 5 жоба әзірлену сатысында, оның мемлекеттік сараптама қорытындысын осы жылдың соңына дейін алу жоспарланған.
Сондай-ақ, ол мегаполисте сыртқы жарықтандыруды орнатуға тоқталды.
«Қаланың аудандық әкімдіктері 511 жарықтандырылмаған көшенің тізбесін жасады, оларға 6 854 шам, 6 705 тірек орнатуды жоспарлап отырмыз, 8 аудан бойынша желілердің ұзындығы – 210 шақырым», – дегенді жеткізді.
Бұдан өзге биыл 22 магистралды көшені жаңғыртуды аяқтау және 4 мыңнан астам жарық нүктесін ауыстыру жоспарланған.