Алматыда IPO мәселелері бойынша кездесу өтті
Бүгін Алматыда «Самұрық-Қазына» АҚ, «ҚазМұнайГаз» ҰК АҚ, «Қазпошта» АҚ, қазақстандық AIX және KASE қор биржалары мен брокерлік-дилерлік ұйымдардың өкілдерімен «ҚазМұнайГаз» ҰК АҚ IPO мәселелері бойынша кездесу өтті.
Алматы, NEGE. Іс-шара қатысушылары жекешелендіру бағдарламасының және портфельдік компаниялардың IPO-ның іске асырылу барысы туралы айтып, бірінші IPO-кандидаты – ҚазМұнайГаз, бағалы қағаздар нарығында инвестициялаудың тетіктері мен тәуекелдері туралы негізгі ақпаратпен бөлісті.
«Самұрық-Қазына» АҚ Қоғаммен байланыс, әлеуметтік-еңбек қатынастары және еңбекті қорғау жөніндегі басқарушы директоры Ғибрат Ауғанов бүкіл Қазақстан бойынша ақпараттандыру-түсіндіру жұмыстарын жүргізудің ауқымдылығын атап өтті. «Бүгін Алматыда Маңғыстау облысында 16 қыркүйекте басталған ақпараттандыру кампаниясын тәмамдаймыз. Республиканың 100 мыңнан астам тұрғынының қатысуымен 120-дан астам кездесу өтті. Біз барлық облыс пен қаланы қамтыдық деуге болады. Дәл осындай шара алғаш рет өтіп жатыр», – деді Ғибрат Ауғанов.
Ол, сондай-ақ, IPO шеңберінде бөлшек инвесторларға, яғни Қазақстан азаматтарына басымдық берілетінін атап өтті. «ҚазМұнайГаз» ҰК АҚ акциясын екі бірдей қазақстандық алаңға орналастыру жоспарланып отыр: KASE және AIX.
«ҚазМұнайГаз» ҰК АҚ-ның 2031 жылға дейінгі жаңартылған стратегиясына сәйкес, компания мұнай өндіруді ұлғайтуды, геологиялық барлау жұмыстары мен мұнай-газ химиясы жобаларын дамытуды жоспарлап отыр. Кездесу ашық диалог форматында өтті.