Алматыда жалпықалалық сейсмикалық жаттығу өтеді
Дүниежүзілік Азаматтық қорғаныс күні қарсаңында, 23 ақпанда сағат 10:00-де Алматыда жоспарлы жалпықалалық сейсмикалық жаттығу өтеді, деп хабарлады Ақматы қаласының әкімдігі.
Алматы, NEGE. «Мегаполистің тұрғындары мен қонақтарынан түсіністік танытып, тыныштық сақтауды сұраймыз. Сейсмикалық жаттығудың негізгі мақсаты қала тұрғындарының төтенше жағдайлар кезіндегі әрекеттің дайындық деңгейін арттыру. Сейсмикалық жаттығулар күні сағат 10:00-де қалалық ескерту жүйесі іске қосылады. Іс-шараның суық мезгілде өткізілуіне байланысты ТЖД азаматтардан жылы киініп, эвакуациялануды сұрайды», - делінген хабарламада.
Еске салсақ, Алматы 9-10 балдық сейсмикалық аймақта орналасқан. Қалада жыл сайын 200-ге дейін әлсіз, сезілмейтін жер сілкінісі болады.
Сейсмологиялық зерттеулер мен бақылаулардың ұлттық ғылыми орталығы болжамды комиссиясының мәліметтері бойынша қалада 7 және одан да көп баллдық жер сілкінісі болмайды.
