Алматыда жалған инвестициялық жоба әшкере болды
Алматыда өмірді сақтандыруға инвестиция салу желеуімен тұрғындардан 620 миллион теңгеден астам қаржы тартқан алаяқтық схемасына қатысты тергеу жүріп жатыр.
Астана, NEGE. Күдікті жылына 12%-ға дейін тұрақты табыс табуға кепілдік берген.
Қаржылық монитринг агенттігінің мәліметінше, ол 2013–2021 жылдар аралығында Partners & Consultants атты «Өмірді сақтандыру» жобасы арқылы азаматтардың ақшасын иемдену схемасын ұйымдастырған. Салымшыларды «Evroasia Global Investment» АҚ және «Evropa Investment» ЖШС есепшоттарына ақша аударуға үгіттеген.
Жобаның сенімділігін дәлелдеу үшін ол жалған халықаралық сақтандыру бағдарламалары мен сертификаттарына сілтеме жасаған. Қаражаттар аударымдар арқылы қабылданған, кейін салымшыларға ұзақ мерзімді салым әсерін қалдыратын жалған құжаттар берілген. Алаяқтық схемасынан барлығы 270 адам зардап шеккен.
Алынған ақшалай қаражатты күдікті жылжымайтын және жылжымалы мүлік сатып алуға жұмсаған.
Қазіргі уақытта бұл мүлікке шектеу қойылып, күдікті қамауға алынды.