Алматыда заңсыз жұмыс істеп келген «Рахат» базары сүрілді
Алматы әкімдігі Жетісу ауданындағы тиісті рұқсат құжаттарсыз жұмыс істеп келген бұрынғы «Рахат» базарының аумағын абаттандыру жұмыстары басталғанын хабарлады.
Астана, NEGE. Сот шешімі заңды күшіне енгеннен кейін аумақты босату жұмыстары басталған.
Түсіндіру жұмыстары жүргізілгеннен кейін 150-ден астам кәсіпкер базар аумағынан көшкен.
Оларға Жетісу ауданы әкімдігі көршілес базарлардан жеңілдетілген шарттармен баламалы сауда орындарын ұсынған.
«Жұмыс барысында кәсіпкерлер сауда контейнерлерін өз бетінше шығарып, кейбір құрылымдарды бұзды. Қазіргі таңда босатылған аумақта абаттандыру жобасы әзірленіп жатыр», – делінген әкімдік хабарламасында.
Босаған аумаққа базарға келушілер мен аудан тұрғындарына арналған көгалдандырылған, жайлы қоғамдық кеңістік пен демалыс аймақтарын салу жоспарланған. Сонымен қатар аумақтың бір бөлігі автотұрақ ретінде пайдаланылмақ.
Әкімдік өкілдерінің түсіндіруінше, бұл көлік тұрақтарын ретке келтіріп, ауданның көлік қозғалысын жақсартуға мүмкіндік береді.
