Алматыда Сәтбаев көшесінің бір бөлігі екі күнге жабылады

Алматы, NEGE. Ауылшаруашылығы жәрмеңкесін өткізуге байланысты Уәлиханов көшесінен Достық даңғылына дейінгі учаскедегі Сәтбаев көшесінің бір бөлігі 11 қазан сағат 20:00-ден 13 қазан сағат 20:00-ге дейін жабылады.

Бұдан басқа, №45, №95 және 121 автобустардың бағытына өзгерістер енгізіледі. Жабылатын учаскені Абай даңғылы арқылы айналып өтуге болады.

Алматы әкімдігінің мәліметінше, 12-13 қазан күндері сағат 8.00-ден 17.00-ге дейін кеңейтілген ауылшаруашылық жәрмеңкесі өтеді. Оған Алматы мен Абай облыстарының фермерлері қатысады.

Жәрмеңкеде 50-тан астам өнім – ет-сүт, жеміс-көкөніс, шұжық өнімдері, өсімдік және жануар майлары және т.б. ұсынылады. Өнімнің жалпы көлемі – 300 тонна. Оның ішінде ет өнімдері – 100 тонна, жеміс, көкөніс өнімдері – 100 тонна, сүт өнімдері – 30 тонна, балық өнімдері – 10 тонна, басқалары – 60 тонна.

Жәрмеңке өтетін орын – Сәтбаев көшесінің бойымен Уалиханов көшесі мен Достық даңғылы аралығында.