Алматыда «Людоедтің» 5 млрд теңгеге бағаланған ғимараты сатылымға шықты

Астана, NEGE. Бұл жолы әл-Фараби даңғылы, 116/57 мекенжайында орналасқан көпфункционалды тұрғын үй кешенін құқық қорғау және арнайы мемлекеттік органдардың балансына беру ұсынылып отыр. Ғимараттың жалпы аумағы 1536,5 шаршы метр, ал орналасқан жер телімінің көлемі 0,3950 гектар.

Негізінде бұл жерде тұрғын үй салынбауы керек еді. Бастапқы жоба бойынша мұнда саябақ болуы тиіс болған.

«№116/57 үйі бекітілген жобаға енгізілмеген. Оның орнында (0,3950 гектар аумақта) Есентай өзеніне қарайтын, тұрғындарға арналған қоғамдық саябақ салу жоспарланған», – делінген Қоспаев ісі бойынша сот үкімінде (құжат көшірмесі редакцияда бар).

Алайда саябақтың орнына тұрғын үй кешені салынған. 2021 жылдың наурызында Елдос Қоспаев бұл нысанды небәрі 46,3 млн теңгеге сатып алған. Ал аудит нәтижесі бойынша оның құны шамамен 5 млрд теңге деп бағаланды. Оның ішінде ғимарат – 4 млрд теңге, ал жер телімі – 957 млн теңге.

Жалпы, Мемлекеттік мүлік департаменті Алматыда Елдос Қоспаевқа тиесілі болған 23 жылжымайтын мүлік нысанын бағалаған. Болжам бойынша, олардың барлығы алдағы уақытта сатылымға шығарылуы мүмкін.

• Тақырыпқа орай: Елдос Қоспаев пен оның отбасына тиесілі бірнеше қымбат автокөлік аукционға шығарылды

Болат Назарбаевтың бұрынғы көмекшісі, «Людоед» лақап атымен танымал Елдос Қоспаев рейдерлікпен айналысып, ұйымдасқан қылмыстық топ құрды деген айыппен сотталған. Сот үкімімен ол 15 жылға бас бостандығынан айырылды.