Алматыда қолы қанға малынған ер адам сұлулық салонына кіріп, дүрбелең туғызды
Алматыдағы сұлулық салондарының бірінде қанға малынған қолымен газ кілтін ұстаған ер адам қызметкерлерді шошытты.
Алматы, NEGE. Оқиға туралы заңгер Анна Чернова әлеуметтік желіде хабарлады. Оның айтуынша, белгісіз ер адам салонға кіріп келіп, жуынатын жерді көрсетуді талап еткен.
Әкімші одан кетуін сыпайы түрде сұрағанымен, ер адам: «Мүмкін мен біреуді өлтірген шығармын?», – деп жауап берген. Қорқып кеткен қызметкер оған дәретхана есігін көрсеткен. Ер адам жуынып болған соң, салоннан шығып кеткен. Осыдан кейін әкімші бірден 102 нөміріне хабарласқан.
Бейнебақылау камераларындағы жазбада полицейлер ер адамды ұстаған сәт те көрсетілген. Куәгерлердің сөзінше, оның жанынан арматура мен пышақ табылған.
Алматы қалалық полиция департаменті ер адамның жеке басы анықталып, жедел түрде ұсталғанын мәлімдеді. Алдын ала мәлімет бойынша, ол мас күйде болған.
Полицияның хабарлауынша, ер адам өз-өзіне дене жарақаттарын салған. Бейнежазбадағы қан да өзіне тиесілі. Басқа адамдарға зиян келтірмеген және айналадағыларға қауіп төнбеген.
Қазір оқиғаның барлық мән-жайы жан-жақты тексеріліп, құқықтық баға берілмек.