Алматыда қоғамдық көлікте әйелді ұрған ер адам қамалды
Алматы полициясы қоғамдық көлікте әйелді ұрған 66 жастағы жергілікті тұрғынды ұстады, деп хабарлайды полиция департаменті.
Алматы, NEGE. «Бұзақылық дерегі бойынша қылмыстық іс қозғалды. Күдікті ұсталып, уақытша ұстау изоляторына қамалды. Сотқа дейінгі тергеу жалғасып жатыр», — деді Алмалы аудандық ПБ-на қарасты полиция бөлімінің бастығы Батұржан Әбдумасаров.
Естеріңізге сала кетейік, автобус жолаушылары арасында жанжал туындаған болатын. Жанжалға әйел адамның қоғамдық көлік ішінде телефонмен қатты сөйлескені себеп болған. 66 жастағы ер адам әйелдің телефонмен сөйлескеніне шыдай алмай оған жұдырық жұмсаған.
Алматы қалалық полиция Департаменті заңдылық пен тәртіпті қамтамасыз ету басты міндет болып қала беретінін баса айтады.
«Әрбір азамат заңдылық пен тәртіптің мүлтіксіз сақталатынына, кез келген заңсыз әрекеттерге тиісті құқықтық бағасын алатынына сенімді болуы керек», — деді Батұржан Әбдумасаров.
