Алматыда футбол алаңына партия туымен жүгіріп шыққан жанкүйер ұсталды
Алматыдағы Орталық стадионда өткен «Қайрат» – «Ордабасы» матчы кезінде алаңға ЖСДП партиясының туымен жүгіріп шыққан жанкүйерді полиция қызметкерлері ұстады.
Астана, NEGE. Алматы қалалық полиция департаментінің мәліметінше, көрермендердің бірі ойын алаңына жүгіріп шығып, қоғамдық тәртіпті және бұқаралық іс-шараларды өткізу кезіндегі қауіпсіздік талаптарын өрескел бұзған.
«Полиция қызметкерлері стадионның қауіпсіздік қызметімен бірлесіп, заңсыз әрекетті дереу тоқтатты. Тәртіп бұзушы дәл ойын алаңында ұсталып, Бостандық аудандық полиция басқармасына жеткізілді», – деп хабарлады полиция.
Оқиғадан кейін ЖСДП партиясы Threads желісіндегі ресми парақшасында жанкүйерге қолдау білдіріп, оның қауіпсіздігіне алаңдайтынын мәлімдеді.
Аталған дерекке байланысты Қазақстан Республикасы Әкімшілік құқық бұзушылық туралы кодексінің 434-бабы («Ұсақ бұзақылық») бойынша әкімшілік іс қозғалды. Іс материалдары шешім қабылдау үшін сотқа жолданады.
