Алматыда ер адам мешіттерде намаз уақытында ұрлық жасаған
Алматы полицейлері күдіктіні ұстады.
Астана, NEGE. Тергеу деректеріне сәйкес, күдікті жамағаттан ұялы телефондар мен әмияндар ұрлаған. Ол намаз уақытындағы адамдардың бейқамдығын пайдаланып, қылмысын жасырын іске асырған.
«Полиция қызметкерлерінің жедел әрі кәсіби жұмысының нәтижесінде ұрлықтарға қатысы бар күдікті ұсталып, әрбір дерек бойынша сотқа дейінгі тергеу жүргізіліп жатыр», – деп мәлімдеді Алатау аудандық полиция басқармасының бастығы Еділхан Байғараев.
Қылмыстық әрекеттің бірнеше эпизоды дәлелденген. Қазіргі уақытта күдікті ер адамның осыған ұқсас басқа да ұрлықтарға қатысы бар-жоғы тексеріліп жатыр.
Полицейлер тұрғындарды жеке затына мұқият болуға және күмәнді тұлғаларды байқаған жағдайда полицияға дереу хабарлауға кеңес етті.