Алматыда бітіру кешіне 200 мың теңгеден жинаған: мектеп директоры жазаланды
Алматыдағы мектептердің бірінде түлектердің бітіру кешіне қомақты қаржы жинау фактісі бойынша аудандық білім бөлімінің бастығы мен мектеп директоры тәртіптік жауапқа тартылды.
Астана, NEGE. Бұл жөнінде қалалық білім басқармасының баспасөз қызметі хабарлады.
Ведомство мәліметінше, тексеру барысында қаражат жинау бастамасы ата-аналар тобы тарапынан көтерілгені және бұл мәселе бейресми ата-аналар чаттарында талқыланғаны анықталған.
«Бастама жеке сипатта болғанына қарамастан, мектеп әкімшілігі мен аудандық білім бөлімінің қызметкерлері оқу орнының этикалық нормалары мен ашықтық принциптерінің сақталуын бақылауды әлсіреткені белгілі болды.
Лауазымдық міндеттерін дұрыс орындамағаны және заңсыз қаражат жинаудың (соның ішінде ата-аналар комитеттері арқылы) алдын алуда бақылаудың болмағаны үшін білім беру мекемесінің басшысы тәртіптік жауапкершілікке тартылды», – делінген басқарманың Nege.kz-ке берген ресми жауабында.
Сондай-ақ, тиісті аудандық білім бөлімінің басшысы да өз қарамағындағы аумақта алдын алу жұмысындағы кемшіліктері үшін тәртіптік жазаға тартылғаны мәлім болды.
Айта кетейік, бүгін алматылық ата-аналардың бірі Президент Қасым-Жомарт Тоқаевқа видеоүндеу жолдап, түлектердің бітіру кешіне әр баладан 200 мың теңгеден ақша жинап жатқанын мәлімдеді. Айтуынша, мектеп әкімшілігі ата-ананың бітіру кешін аз сомамен сапалы өткізу туралы ұсынысына да құлақ аспаған. Осы жайттарды айта келе, жас түлектің анасы Президенттен қала мектептерінде тәртіп орнатуға ықпал етуін өтінген еді.