Алматы облысында карантин күшейтіледі
Бүгіннен бастап Алматы облысында бірқатар карантиндік шектеулер енгізіледі.
Алматы, NEGE. Әзірленіп жатқан жаңа қаулыға сәйкес жексенбі күні тамақтану орындары, сауда үйлері, кинотеатрлар жабылады. Мекемелер жаппай залалсыздандырылып, ұжым қызметкерлерінің 70 проценті қашықтан жұмыс істейтін болады. Сақтық шараларын күшейтуге аймақтағы эпидахуалдың күрделенуі себеп болған. Әсіресе өңірдегі Жамбыл, Іле, Қарасай, Еңбекшіқазақ аудандары мен Талдықорғанда індет өршіп тұр. Қазір күніне 100-ден астам адамнан ковид белгілері анықталып отыр. Сырқаттанғандардың қатарында мектеп жасындағы балалар бар. Соған байланысты оқушылардың біразы қайтадан онлайн оқыту жүйесіне көшірілуі мүмкін.
Санитарлық-эпидемиологиялық қадағалау департаменті басшысының орынбасары Асхат Шарапиев: "Әзірге енді біз бір мен бесінші сынып балаларын кезекші сыныптарын ғана қалдырамыз. Қалғандары онлайн режимінде оқиды. Ал енді мектеп бітірейін деп отырған балалар бар, олар оқи береді. Және бірінші курстың студенттері оқи береді" деді.