Алматы облысында қаңтар оқиғасы кезінде ұрланған қару-жарақ табылды
Алматы облысында қаңтар айындағы тәртіпсіздіктер кезінде құқық қорғау органдарының қару-жарақ қоймаларынан ұрланған тапаншалар табылып, тәркіледі.
Алматы, NEGE. "26 мамыр күні Алматы облысы прокуратурасының бастамасымен жүргізілген арнайы операцияның нәтижесі бойынша полиция департаменті қаңтар айындағы тәртіпсіздіктер кезінде құқық қорғау органдарының қару-жарақ қоймаларынан ұрланған 18 патроны бар 6 Макаров тапаншасын, сондай-ақ 1 Калашников автоматын тауып, тәркіледі", - деді Алматы облысы прокуратурасының баспасөз қызметі.
Ведомство өкілдерінің мәлімдеуінше, қару-жарақтар 2 күдіктінің тұрғылықты жерінен және арнайы жабдықталған қоймадан табылған.
Қазіргі уақытта күдіктілер ұсталды, ҚР ҚК 287-бабы 3-бөлігі (қаруды, оқ-дәрілерді, жарылғыш заттарды және жарылғыш құрылғыларды заңсыз сатып алу, беру, өткізу, сақтау, тасымалдау немесе алып жүру) бойынша сотқа дейінгі тергеу басталды, сотқа дейінгі тергеу шеңберінде істің барлық мән-жайларын анықтауға бағытталған жедел-тергеу іс-шаралары жүргізілуде, сондай-ақ ұсталғандар басқа қылмыстарға қатыстылығы бойынша тексеріліп жатыр.