Алматы облысында 11-12 шілде карантин күшейтіледі
Алматы облысында 11 және 12 шілдеде қатаң шектеу шаралары енгізіледі, деп хабарлайды Тауарлар мен қызметтердің сапасы мен қауіпсіздігін бақылау департаменті.
Алматы, NEGE. Алматы облысының бас мемлекеттік санитар дәрігерінің орынбасары мынадай қаулы жасады:
"Облыс аудандары мен қалаларының әкімдері, Алматы облысының полиция департаменті, Облыстың кәсіпкерлік және индустриалды-инновациялық даму басқармасы және Алматы облысының "Атамекен" ҰКП филиалы 2020 жылғы 11 және 12 шілдеде қоғамдық көліктің, сондай-ақ, барлық нысанның қызметін тоқтатуды қамтамасыз етсін", - делінген хабарламада.
Облыстың қалыпты өмір сүруін қамтамасыз ету үшін қажетті объектілер ережеге бағынбайды. Олардың ішінде:
1. Облыстың коммуналдық қызметтері мен инфрақұрылымы (электр энергетикалық компаниялар, сумен/жылумен жабдықтау, өртке қарсы және авариялық-құтқару қызметтері, тұрғын үй қорын басқару саласындағы қызметтер (электрик, сантехник, аулалар мен үй-жайларды жинау, авариялық қызмет, оның ішінде лифтілерге қызмет көрсету), көшелер мен үй-жайларды жинау, қоқыс пен қалдықтарды жинау, өңдеу және кәдеге жарату, дезинфекциялық қызметтер. Сондай-ақ, тізімге жол қозғалысын реттеудің техникалық құралдарының жұмыс істеуін қамтамасыз ететін ұйымдар кірді;
2. Өнеркәсіптік, өндірістік кәсіпорындар, ашық кеңістікте құрылыс компаниялары күшейтілген санитарлық-дезинфекциялық режимде жұмысын жалғастырады;
3. Медицина ұйымдары;
4. Стоматология ұйымдары;
5. Ветеринариялық қызметтер, оның ішінде ветеринариялық және мал шаруашылығы жедел жәрдем қызметтері;
6. Зертханалардың барлық түрі;
7. Азық-түлік супермаркеттері мен дүкендер, оның ішінде сауда және ойын-сауық орталықтары мен көппәтерлі тұрғын үйлердің ішіндегі;
8. Дәріханалар, оның ішінде ветеринариялық;
9. Бұқаралық ақпарат құралдары;
10. Ауыл шаруашылығы, ауыл және балық шаруашылығы, мал шаруашылығы жұмыстарын жүргізуге тартылған ұйымдар мен қызметкерлер;
11. Күнделікті жұмыс кестесі бар және күшейтілген санитарлық-дезинфекциялық режимді сақтай отырып, автожанармай құю және автогаз құю станциялары;
12. Жұмыс алгоритмін сақтай отырып әуежайлар, теміржол вокзалдары;
13. Сауда-логистикалық орталықтар, қоймалар, олардың жұмысын қамтамасыз ететін тұлғалар мен ұйымдар;
14. Салт бойынша қызмет көрсету объектілері, зираттар;
15. Мемлекеттік басқарудың үздіксіз жұмыс істеуін қамтамасыз ететін мемлекеттік, құқық қорғау және басқа да мамандандырылған органдар мен олардың ведомстволық бағынысты ұйымдары;
16. Жолдар мен көпірлерге, оның ішінде теміржолдарға қызмет көрсету бойынша қызметтер.
Қаулы 2020 жылғы 11 шілдеде сағат 00:00-ден бастап күшіне енеді.