Алматы жұрты Мұхтар Шахановпен қоштасты
Алматыда Абай атындағы Қазақ ұлттық опера және балет театрында Халық жазушысы, Қазақстанның Еңбек Ері, көрнекті ақын және қоғам қайраткері Мұхтар Шахановпен қоштасу рәсімі өтті.
Астана, NEGE. Қазақстан Жазушылар одағының хабарлауынша, ақынды ақтық сапарға шығарып салуға мемлекет және қоғам қайраткерлері, зиялы қауым өкілдері, замандастары мен жыр сүйер қауым жиналды.
Сондай-ақ қаралы жиынға Қазақстан Парламенті Сенатының төрағасы Мәулен Әшімбаев, премьер-министрдің орынбасары – мәдениет және ақпарат министрі Аида Балаева, Алматы әкімі Дархан Сатыбалды және басқа да мемлекет қайраткерлері қатысты. Сенат төрағасы Мәулен Әшімбаев Мемлекет басшысының көңіл айту жеделхатын оқып берді.
«Сондай-ақ ақынмен қырғызстандық жазушы Шолпонбек Абыкеев қоштасып, Қырғызстан Президенті Садыр Жапаровтың көңіл айту сөзін жеткізді», – делінген Одақ хабарламасында.
Айта кетейік, Мұхтар Шаханов бұған дейін хабарланғандай Кеңсай зиратына емес, өзінің туған жерінде жерленетін болды. Ақынның жаназасы ертең, 22 сәуірде Түркістан облысы Отырар ауданы Жаңа Шілік ауылында шығарылып, сүйегі Қоғам ауылдық зиратына қойылатын болды.
Бұған дейін жары Ханшайым Шаханова Мемлекет басшысы Қасым-Жомарт Тоқаевтың атына ресми өтініш жолдап, Президентке ақынның соңғы аманатын жеткізген. Онда ақынның өзі көзі тірісінде туыстары арқылы денесін Отырар өңіріндегі Арыстанбаб кесенесі маңына қоюды өтінген.
