Алматы облысындағы зауыттағы жарылыс: Зардап шеккендердің барлығы қаза тапты
2025 жылғы 23 мамырда Алматы облысында орналасқан «АзияАгроФуд» АҚ-ның құрамажем зауытында болған жарылыстан зардап шеккен барлық қызметкердің қаза тапқаны туралы компанияның баспасөз қызметі мәлімдеді.
Алматы, NEGE. «Бұл ауыр қайғылы жағдай бүкіл компаниямыз үшін орны толмас қасіретке айналды. Біз әріптестерімізді ғана емес, ұжым өміріне еңбекқорлығы мен адами қасиеттері арқылы терең із қалдырған жандарды жоғалттық», – делінген ресми хабарламада.
Компания қаза тапқандардың отбасы мүшелеріне, жақындары мен достарына шын жүректен көңіл айтады.
«Біз бұл ауыр сәтте отбасыларға барынша қолдау көрсету үшін барлық қажетті шараны қабылдаймыз. Заңмен және ішкі бағдарламалармен қарастырылған сақтандыру төлемдерінен бөлек, қосымша материалдық көмек көрсетіледі. Компания марқұмдардың жерлеу рәсіміне байланысты барлық шығынды өз мойнына алады, сондай-ақ олардың мүмкін болған қарыздарын толық өтеуді қамтамасыз етеді. Әрбір отбасыға психологиялық және заңдық қолдау көрсетіліп, қажет болған жағдайда жеке сүйемелдеу ұйымдастырылады», – деп хабарлады компания.
Сонымен қатар, компания қаза тапқандардың туыстарымен үнемі байланыста екенін және қажет болған жағдайда ұзақ мерзімді қолдау көрсетуге дайын екенін атап өтті.
Қазіргі уақытта жарылыстың себептерін анықтау бойынша тергеу жүргізілуде.
Компания мемлекеттік органдар мен төтенше қызметтермен тығыз ынтымақтастық орнатқан және ішкі аудит те басталған.
«Біздің басты мақсатымыз – тек шындықты анықтау ғана емес, болашақта мұндай қайғылы жағдайлардың алдын алу үшін барлық қажетті шараларды қабылдау», – делінген хабарламада.
