Алматы облысында жоғалып кеткен екі бала таудан табылды
Алматы облысында құтқарушылар көшеде ойнап жүріп, жоғалып кеткен 2 баланы табуға көмектесті.
Алматы, NEGE. Төтенше жағдай министрлігінің хабарлауынша, 30 сәуір күні кешке Талғар ауданында екі бала жеке тұрғын үйдің алдында көшеде ойнап жүріп, жоғалып кеткен. Ата-аналар балаларын өздігінен таба алмағандықтан, құтқарушылардың көмегіне жүгінген.
Тәуліктің қараңғы уақытына қарамастан түні бойы жалғастырылған іздеу жұмыстарына 2 кинологиялық есептоп пен ұшқышсыз ұшу аппараты тартылды. Бұған қоса, іздеуге балалардың жақындары, жергілікті тұрғындар мен полиция өкілдері қатысты.
«Бірлескен жұмыс нәтижесінде 2020 жылы туған ұл бала үйден 3 км қашықтықта таулы аймақтан түнде табылды. Ал 2015 жылы туған әпкесі Қотыр деген таулы аймақтан 10 км жерден таңертең табылды. Балалар дәрігерлердің қарауынан кейін ата-аналарына табысталды», – делінген хабарламада.