Алматы облысында кәмелетке толмаған қызды қызметтік көлікпен жеткізіп тастауды ұсынған полицейлер жұмыстан шығарылды
Іле ауданында 17 жастағы қызға қатысты оқиғадан кейін екі инспектор жұмыстан шығарылды.
Алматы, NEGE. Іле аудандық мәслихатының депутаты Нұрлан Байғазиевтің хабарлауынша, Іле ауданында екі полицей 17 жастағы қызды қызметтік көлікпен «Саяхат» автовокзалына жеткізіп тастауды ұсынғаннан кейін жұмыстан босатылды.
«Аталған іс бойынша бұл қызметкерлер жұмыстан шығарылды», — деп жазды ол өзінің Instagram парақшасында.
Депутат жариялаған видеода ол аялдамада полицей көлігінің жанында тұрған кәмелетке толмаған қызды байқайды. Қыз полицейлердің оған «Саяхатқа дейін жеткізіп салуды» ұсынғанын айтып берген.
