Алматы облысында «Алатау» ипотекалық бағдарламасына құжат қабылдау басталады
Алматы облысында 25 тамыз күні «Алатау» ипотекалық бағдарламасына өтінім қабылдау басталады. Бұл туралы облыстың тұрғын үй-коммуналдық шаруашылық және абаттандыру басқармасының басшысы Димаш Қожабеков айтты, деп хабарлайды ҚазАқпарат.
Алматы, NEGE. Оның сөзінше, бағдарламаның басты мақсаты — мемлекеттік қызметкерлер мен спортшыларға, сондай-ақ бюджеттік сала мамандарына қолжетімді баспана беру. Бағдарлама аясында 30 млн теңгеге дейін ипотекалық несие беріледі және пайыздық мөлшерлемесі 5% болады. Ал бастапқы жарна мөлшері — 10%.
Оған қатысу үшін Алматы облысында кемінде соңғы 24 ай ресми жұмыс өтілі талап етіледі және өтініш берген кезде адамның меншігінде үйі болмауы керек.
— Бағдарламаға облыстық бюджеттен 3,146 млрд теңге, ал «Отбасы банк» тарапынан қосымша 629 миллион теңге қаржы бөлінді. Бұл қаржы 120-дан астам азаматты баспанамен қамтамасыз етуге мүмкіндік береді, — деді ол.
Өтінім қабылдау 2025 жылдың 25 тамызында басталады. Қабылдау орны — Қонаев қаласы, Қонаев көшесі, 7/1, «Отбасы банк» ғимараты.
