Алматы облысы Іле ауданы әкімінің бұрынғы орынбасары ҰҚК назарына ілікті
Алматы облысы Іле ауданы әкімінің бұрынғы орынбасары Қуат Ақшабаевқа қатысты сотқа дейінгі тергеп-тексеру жүргізіліп жатыр.
Астана, NEGE. Ақпаратты Ұлттық қауіпсіздік комитеті растады.
Бұған дейін журналист Михаил Козачковтың Telegram-дағы арнасында ҰҚК-нің Сыбайлас жемқорлыққа қарсы іс-қимыл қызметі Іле ауданы әкімінің орынбасарын ұстағаны жөнінде ақпарат жарияланды. Ол 28 млн теңге пара алған деген күдікке ілінген.
«Қазіргі уақытта сотқа дейінгі тергеп-тексеру жүргізіліп жатыр», – деп хабарлады ҰҚК өкілдері.
Ведомство тергеу деректерін жария етуге болмайтынын алға тартып, қосымша мәлімет беруден бас тартты.
Ал Іле ауданы әкімдігі Ақшабаевтың ұсталғанға дейін өз еркімен қызметтен кету туралы өтініш бергенін мәлімдеді.
«16 қаңтарда ол аудан әкімінің орынбасары қызметінен босатылды және қазіргі уақытта бұл лауазымды атқармайды», – делінген әкімдіктің баспасөз қызметі таратқан хабарламада.
Әкімдік өкілдері бұл жағдай құқық қорғау органдарының құзыретінде екенін атап өтті.
Қуат Ақшабаев Алматы облысы Іле ауданы әкімінің орынбасары қызметіне 2025 жылғы қаңтарда тағайындалған.
