Алматы облысында 20 түрлі дәрі шығаратын фармацевтикалық зауыт салынады
Жеке инвестициялар құны 32,5 млрд теңге болады. Премьер-министр Олжас Бектенов тиісті қаулыға қол қойды.
Астана, NEGE. Денсаулық сақтау министрлігі мен «Steppe pharmaceuticals» ЖШС арасында Алматы облысындағы «Алатау» АЭА аумағында толық циклді биофармацевтикалық кешен салу жөнінде келісім жасалды. Үкімет келісімді мақұлдады.
Фармацевтикалық зауытта дәрілік препараттың 20 түрі шығарылады деп жоспарланып отыр. Олардың қатарында онкологиялық және сирек кездесетін ауруларды емдеуге арналған дәрілер, сондай-ақ заманауи иммунобиологиялық препараттар бар.
«Кәсіпорынды іске қосу 2031 жылға, жобалық қуатқа шығу 2032 жылға, ал негізгі бағыттар бойынша толық циклге көшу 2034 жылға жоспарланған», – делінген Үкімет хабарламасында.
Жоба елдің дәрілік қауіпсіздігін нығайтуға және Алматы облысы аумағында заманауи фармацевтикалық өндіріс инфрақұрылымын қалыптастыруға мүмкіндік береді. Жоба аясында шамамен 60 жаңа жұмыс орны ашылады деп жоспарланып отыр.
«Дәрі-дәрмек өндіру мен сертификаттаудан бөлек, ғылыми-зерттеу және тәжірибелік-конструкторлық жұмыстарды жүргізу де қарастырылған. Өзінің R&D бағытын дамыту, оның ішінде биоэквиваленттілік зерттеулерін жүргізу, тіркеу құжаттарын дайындау және халықаралық GMP стандарттарын енгізу жоспарланған», – делінген хабарламада.
Бұдан бөлек кешен базасында қазақстандық мамандарды оқыту және олардың біліктілігін арттыру жүйесі құрылмақ.
