Алматы маңында жол апатынан Үндістаннан келген екі студент қаза тапты
Бұл туралы Үндістанның Қазақстандағы елшілігі хабарлады.
Астана, NEGE. Елшілік мәліметінше, қайғылы жағдай 6 қаңтар күні болған – Үндістанның бес азаматы жол апатына ұшыраған. Олардың төртеуі Оңтүстік Қазақстан медицина академиясының студенті болса, біреуі Үндістаннан келген турист болған.
«Өкінішке қарай, екі адам оқиға орнында қаза тапты, ал үшеуі ауыр жарақат алып, жансақтау бөлімінде ем алып жатыр», – делінген елшілік хабарламасында.
Елшілік өкілдері қаза болған студенттер – Раджастхан штаты тұрғындарының туыстарына қайғыра көңіл айтқан.
Алматы облыстық полиция департаменті Алматы-Бішкек тасжолының 86-шақырымында болған жол-көлік апаты бойынша қылмыстық іс қозғалғанын мәлімдеді.
«Алдын ала мәліметтер бойынша, 33 жастағы Toyota Alphard маркалы автокөліктің жүргізушісі көлікті игере алмай, көлік аударылып кеткен. Жол-көлік оқиғасы салдарынан жүргізуші алған жарақаттарынан оқиға орнында көз жұмды. Тағы екі жолаушы медициналық мекемеде қайтыс болды, ал өзге үш адам түрлі жарақатпен ауруханаға жеткізілді», – делінген хабарламада.
Сондай-ақ полицейлер қазіргі уақытта оқиғаның мән-жайын анықтауға бағытталған тергеу әрекеттері жүргізіліп жатқанын хабарлады.
