Алматы әкімдігі «Family Park-тің орнына тұрғын үй кешені салынады» деген сыбысқа жауап берді
Бұған дейін желіде Алматыдағы отбасылық «Family Park ойын-сауық саябағы сүріліп, орнына тұрғын үй кешені салынуы мүмкін» деген сыбыс шыққан еді. Алайда қала әкімдігі бұл ақпаратты теріске шығарды.
Астана, NEGE. Әкімдік өкілдері қаланың Бас жоспары мен егжей-тегжейлі жоспарлау жобасына сәйкес, Family Park аумағы қоғамдық демалыс аймағы мәртебесін сақтайды деп сендіреді.
«"Family Park аумағында тұрғын үй кешендері немесе басқа да нысандар салынады" деген ақпарат шындыққа жанаспайды. Саябақтың нысаналы мақсатын өзгерту қарастырылмаған. Қазіргі таңда тек саябақ аумағын кешенді жаңарту, көріктендіру және жаңғырту жұмыстарын жүргізу үшін оны мемлекеттік басқаруға қайтару мәселесі қарастырылып жатыр», – делінген ресми хабарламада.
Әкімдіктің хабарлауынша, жаңғырту жұмыстары аяқталғаннан кейін Family Park қала тұрғындары мен қонақтарының демалысына арналған қоғамдық кеңістік ретінде қызметін жалғастырады.
