Алматы әкімі ТЖД-ның мамандандырылған жасағының жұмысымен танысты
Алматы қаласының әкімі Дархан Сатыбалды Төтенше жағдайлар департаментінің Мамандандырылған жасағына барып, бөлімшенің қызметімен танысты.
Алматы, NEGE. 1981 жылы пайдалануға берілген бұл нысан Жетісу ауданының орталық бөлігінің өртке қарсы қорғалуын қамтамасыз етеді. Мұнда 124 құтқарушы қызмет атқарады, олардың қарамағында 29 бірлік арнайы техника бар. 2023 жылдың соңында ғимаратта күрделі жөндеу жұмыстары аяқталып, бұл жасақтың жұмыс тиімділігін едәуір арттыруға мүмкіндік берді.
Құтқарушылар күн сайын қала тұрғындарының қауіпсіздігін қорғап, жоғары кәсібилік пен ісіне адалдық танытып келеді. Қала әкімі олардың еңбегінің маңыздылығын атап өтіп, төтенше қызмет бөлімшелерін қолдау қала әкімдігінің басты басымдығы екенін айтты.
Жыл сайын Алматыда жаңа өрт сөндіру бөлімшелері ашылып, бұл шалғай аудандардың қорғанысын күшейтуге және жедел қызметтер инфрақұрылымын дамытуға мүмкіндік береді. Әсіресе, жаңа және жылдам өсіп келе жатқан тұрғын аудандарда өрт сөндіру деполарын салуға ерекше көңіл бөлінеді, бұл өрт сөндірушілердің жету уақытын қысқартуға және төтенше жағдайларға жедел әрекет етуге ықпал етеді.
Қазіргі таңда Алматыда өртке қарсы қызметтің 20 бөлімшесі жұмыс істейді. Алайда қала аумағының ұлғаюына байланысты ТЖД мамандарының бағалауынша, қалаға кемінде тағы 15 өрт сөндіру бөлімі қажет.
Жақындағы жоспарға Бостандық және Медеу аудандарында төрт жаңа өрт сөндіру депосын салу кіреді.
2016 жылдан 2025 жылға дейін Алматы қаласы ТЖД-ның автопаркі 162 техникамен толықты, оның 129-ы жергілікті бюджет есебінен сатып алынды. Бұл материалдық-техникалық базаны нығайтып, халықты қорғау бойынша міндеттерді тиімді орындауға мүмкіндік береді.
