Алимент төлеу қорына 38 млн теңге жиналған
Әділет министрі Марат Бекетаев алимент төлеу қорына 38 млн теңге жиналғанын мәлім етті.
Алматы, NEGE. «Қазіргі таңда Алимент қорына жиналған жалпы сома – 38 миллион теңге. Алайда бұл соманың қалай жұмсалатынын білмеймін. Себебі Әділет министрлігі осы процеске қатыспайды. Бұл бюджеттің қаражаты емес, сот орындаушылардың қоры. Жиналған қаражат қалай жұмсалатынын солардан сұрау керек», – деді Марат Бекетаев ОКҚ-да өткен баспасөз мәслихатында.
Министрдің айтуынша алимент төлеуден бас тартқан адамдарға қосымша ықпал ету талаптары қарастырылып жатқан жоқ. Бұған дейін министрлік алимент төлемеген азаматтармен жұмыс жүргізу үшін құқық қорғау органдарымен және барлық әкімдікпен меморандумға қол қойған.
Соның арқасында алимент төлеуден жалтарған 2,5 мың адам жұмысқа орналастырылған.
