Әли Ахмедов Астанада жекпе-жек өткізеді

Алматы, NEGE. Турнирдің басты жұлдызы – Олимпиада чемпионы Данияр Елеусінов. Сонымен қатар, көрермендер Қуат Хамитов пен Мариф Пираев сынды спортшылардың қатысуымен тартысты жекпе-жектерді тамашалайды.

Орта салмақта өнер көрсететін Әли Ахмедов (23-1, 17 КО) те аталмыш турнирдің басты жұлдыздарының бірі ретінде шаршы алаңға шығады.

Бұл туралы AllStars Boxing промоутерлік компаниясы мәлімдеді. Әлидің қарсыласының есімі әзірге жарияланған жоқ.

«Біз қазақстандық боксшы Әли Ахмедовтың AllStarsBoxing 3 турнирінде өнер көрсететінін қуана хабарлаймыз», – деп жазды ұйым әлеуметтік желідегі парақшасында.

Әли Ахмедов рингке жақында ғана шықты. Ол 18 қаңтарда Коммерсте (АҚШ, Калифорния) америкалық Малкольм Джонсты (17-5-1, 10 КО) екінші раундта нокаутқа жіберді.

Осы жекпе-жектен кейін Калифорния штатының Атлетикалық комиссиясы оны дисквалификациялады. Ахмедов 31 қаңтарға дейін рингке де, спарингке де шыға алмайды. Ал, қазақстандықтың қарсыласы Джонс 3 наурызға дейін жарыстарға қатыса алмайды.