Әлеуметтік осал топтарға несие жеңілдігі берілуі мүмкін
Қазақстанда әлеуметтік осал топтар мен төтенше жағдайдан зардап шеккендерге арналған несие төлеуді кейінге шегеру туралы жоба дайындалды.
Алматы, NEGE. Қаржы нарығын реттеу және дамыту агенттігі әзірлеген құжат «Ашық НҚА» порталында жарияланды. Құжатта халықтың әлеуметтік осал санатына жататын азаматтар мен ТЖ салдарынан табысынан айырылған адамдар үшін несие төлеуді кейінге қалдыру қарастырылған.
Құжатта көрсетілгендей, кейінге шегеру кемінде 3 ай мерзімге беріледі. Егер азаматтың табысы төмендегені немесе төтенше жағдайдан зардап шеккені құжатпен расталса, бұл жеңілдік қосымша комиссиясыз ұсынылады.
- Қолдану шарты – табыстың төмендеуі немесе ТЖ салдарынан қиындыққа тап болу
- Комиссия алынбайды
- Қажеттілік – растайтын құжаттарды ұсыну
- Жағдайды бағалау – өмірлік жағдайдың күрделілігіне байланысты
«Шешім қабылдау кезінде борышкердің қарызды өтеуге қабілетсіздігіне себеп болған жағдайлардың сипаты ескеріледі», – делінген агенттік түсіндірмесінде.
Қоғамдық талқылау 2025 жылдың 24 шілдесіне дейін жалғасады. Қызығушылық танытқан азаматтар «Ашық нормативтік-құқықтық актілер» порталында өз ұсыныстары мен пікірлерін қалдыра алады.