Әлеуметтік желілерде референдум жөнінде анонимді түрде үгіт-насихат жүргізуге тыйым салынады
Әлеуметтік желілерде немесе мессенджерлерде фейк немесе анонимді аккаунттардан үгіт жүргізуге тыйым салынады, деп мәлімдеді АҚДМ Ақпарат комитетінің төрағасы Қанат Ысқақов.
Алматы, NEGE. «Үгіт-насихат жасаудың басты қағидаларының бірі – анонимді болмау, яғни оның авторы болуы керек. Әлеуметтік желі, онлайн-платформа, мессенджерлер – мұның барлығы бұқаралық ақпарат құралдары. Сәйкесінше, осы платформаларда үгіт-насихат жүргізу үгіт-насихат болып есептеледі және оған да заң талаптары таратылады. Анонимді материалдарды жариялауға тыйым салынады», - деді журналистердің сұрақтарына жауап берген Қанат Ысқақов.
Бас прокурордың орынбасары Болат Дембаев аноним үгіт материалдарын таратқаны үшін ӘҚБтК 113-бабы бойынша әкімшілік жауапкершілік қарастырылғанын (25 АЕК мөлшерінде айыппұл) еске салды.
«Республиканың конституциялық құрылысын күштеп өзгертуге, оның тұтастығын бұзуға, мемлекет қауіпсіздігіне нұқсан келтіруге, әлеуметтік, нәсілдік, ұлттық, діни, тектік-топтық және шежірелік астамшылыққа, сондай-ақ қатыгездік пен зорлық-зомбылыққа үгіттеуге жол берілмейді. Мұндай әрекеттер ҚР Қылмыстық кодексінің баптары бойынша әлеуметтік және ұлттық алауыздықты қоздырғаны үшін, сондай-ақ билікті күшпен басып алуға немесе билікті күшпен ұстап тұруға үгіттегені және жария түрде шақырғаны үшін қылмыстық жауапкершілікке әкеп соғады», - деп атап өтті Дембаев.
