Әлеуметтік медициналық сақтандыру қоры: Covid-19 диагнозын анықтайтын тест неге жетіспейді?
«Әлеуметтік медициналық сақтандыру қоры» коммерциялық емес акционерлік қоғамы Қоғамдық кеңес мүшелерімен тағы онлайн-офлайн форматта отырыс өткізді.
Алматы, NEGE. Қоғамдық кеңестің жиынын Сергей Пономарев жүргізді. Ал отырысқа Қор басшысы Айбатыр Жұмағұлов, Айдос Сарым, Расул Жұмалы, Марат Қайырбеков, Ерік Рахым қатысып, індет кезінде тіркелген кейбір түйткілді ортаға салды.
Әлеуметтік медициналық сақтандыру қорының басшысы Айбатыр Жұмағұловтың айтуынша, жұрт вирусқа қарсы дәрілерді, антиобиотиктерді жаппай сатып алуда. "Ол дұрыс емес. Олардың ешқайсысы коронавирусқа ем емес. Яғни, өзін-өзі емдеу дұрыс емес" деді.
Отырыс негізінен сұрақ-жауап түрінде өтті. Онда негізінен соңғы кезде әлемді, елімізді шарпыған індеттің медицина саласына тигізген әсері туралы сөз болды. Пікір алмасу форматында өткен жиында індетке қарсы күресте алдыңғы шепте жүрген дәрігерлерге түскен ауыртпалық, оларға төленетін үстемақы жайы да айтылды. Ең басты мәселе – Covid-19 диагнозының бар-жоғын анықтайтын ПТР-тесттің жетіспей жатқаны, дәріханаларда қажетті дәрі-дәрмектің тапшылығы мен осы тығырықтан қалай шығу керектігі туралы мамандардың пікірі тыңдалды. Науқастар саны неге көбейіп кетті? Бұл сауалдар да назардан тыс қалмады. Әлеуметтік медициналық сақтандыру қорынан көзделген қаржының орынды жұмсалуы туралы да есеп берілді.