Әлемнің екінші ұстазы
Ғұлама ойшыл Әбу Насыр Әл-Фарабидің 1150 жылдығына орай Мәдениет және спорт министрлігі «Ұстаздың оралуы» деректі фильмін түсіріп, еліміздің барлық музейі мен кітапханасында тақырыптық көрме өткізуді жоспарлап отыр.
Алматы, NEGE. Мерейтойы аясында ұлы ойшылдың еңбектерін аудару, Әл-Фараби энциклопедиясын шығару, деректі фильмдер мен кино түсіру сынды іс-шаралар қолға алынды.
«Күні кеше Алматы қаласында «Әлемнің екінші ұстазы» Әбу Насыр әл-Фараби бабамыздың 1150 жылдық мерейтойын бастаудың рәсімі халықаралық деңгейде өтті. Қазақ ұлттық университетінде «Әбу Насыр әл-Фараби атындағы орталық» ашылды. Бұл ретте биылғы жылы атап өтетін маңызды іс-шаралар барысында ысырапшылдық пен науқаншылдыққа жол берілмейтіндігіне баса назар аударғым келеді», - деді Мәдениет және спорт министрі Ақтоты Райымқұлова министрліктің кеңейтілген алқа отырысында.
Сонымен қатар министр «Әл-Фараби жолымен» халықаралық экспедициясын ұйымдастыру, Сириядағы Дамаск қаласында орналасқан «Әл-Фараби» кесенесінің макеттік көшірмесін Түркістан облысындағы Отырар музей-қорығының аумағында орнату мәселесі қосымша пысықталып жатқанын айтып өтті. Бұдан бөлек ғалым туған Оқсыз қалашығының археологиялық және ғылыми зерттеу жоспарланып отыр.
Айта кетейік, бұл мерейтой ЮНЕСКО-ның қамқорлығымен жыл бойы халықаралық ауқымда аталып өтілетін болады. Әлемнің бірнеше елдерінде, Қазақстаннан өзге Париж, Италия, Иордания, Түркия, Қытай, Сирия сынды елдерде ғылыми-конференциялар өтеді.
