Әлемге әйгілі боксшы Рой Джонс Қазақстан чемпионатының ашылуында ән шырқады (видео)
Желтоқсанның 18-і күні Қарағандыда басталған бокстан Қазақстан чемпионатының ашылу салтанатына жартылай ауыр салмақтағы бұрынғы абсолютті әлем чемпионы Рой Джонс келді.
Алматы, NEGE. Чемпионаттың ашылу салтанатына танымал боксшылар Рой Джонс, Василий Жиров, Ермахан Ыбырайымов және Серік Қонақбаев қатысты. Америкалық бокс жұлдызы Рой Джонс спортшыларға қолдау білдіріп, көрермендерге арнап ән шырқады.
Айта кетейік, чемпионат ерекше маңызға ие, өйткені осы турнирдің жеңімпаздары ұлттық құрама сапына еніп, Олимпиада ойындарына дайындықты бастайды.
Қарағандыда бокстан Қазақстан чемпионаты 24 желтоқсанға дейін жалғасады. Спортшылар ерлер арасында 13, әйелдер арасында 12 салмақ дәрежесінде сынға түседі. Қатысушылар арасында Париждегі Олимпиада ойындарының қола жүлдегері Назым Қызайбай да бар.
