Әлемдегі жанармай дағдарысы: Қазақстан рейстерді қысқарта ма?
Әлемде ірі авиакомпаниялар жанармай бағасының қымбаттауына байланысты рейстерді азайтып жатыр. Осыған байланысты NEGE тілшісі Қазақстандағы жағдайды Көлік министрлігі мен Энергетика министрлігінен сұрап білді.
Астана, NEGE. Энергетика министрлігі елде әуеотын қоры жеткілікті екенін мәлімдеді. Мұнай тасымалдау және өңдеу департаментінің директоры Дәулет Арықбаевтың айтуынша, елде жылына шамамен 750 мың тонна әуеотыны өндіріледі, ал жалпы сұраныс 1,2 млн тоннаға жетеді. Яғни, отандық өндіріс барлық қажеттілікті толық жаппайды, жетіспейтін бөлігі импорт арқылы толықтырылады. Соған қарамастан, өндірілетін әуеотыны алдымен ішкі рейстерге бағытталады. Нәтижесінде, ел ішіндегі әуе қатынасы толықтай отандық жанармаймен қамтамасыз етіліп отыр. Қазіргі таңда республика бойынша әуеотыны қоры шамамен 150 мың тоннаны құрайды.
«Ішкі нарыққа рейстер үшін жеткізілетін әуеотыны толықтай қазақстандық өнім есебінен жабылады. Қор жеткілікті. Қазіргі таңда ел бойынша шамамен 150 мың тонна әуеотыны бар», – деді ол NEGE тілшісінің сұрағына жауап беріп.
Көлік вице-министрі Мақсат Қалиақпаров та әуе компаниялары жанармаймен толық қамтамасыз етілгенін айтты. Оның сөзінше, қазіргі таңда рейстерді қысқарту мәселесі күн тәртібінде тұрған жоқ.
«Бүгінгі күні әуе рейстерін азайту немесе қысқарту мәселесі қаралып жатқан жоқ. Егер қандай да бір өзгерістерді байқасақ, міндетті түрде хабарлаймыз. Бірақ қазір ондай жағдай жоқ. Керісінше, бізде жаңа рейстер ашу жоспарланып отыр», – деді вице-министр.
Сондай-ақ Қалиақпаровтың айтуынша, әуе тасымалындағы жанармай бағасын төмендету бағытында жұмыстар жүргізіліп жатыр.
Бұған дейін Халықаралық әуе көлігі қауымдастығы (IATA) Еуропадағы авиаотын қоры небәрі алты аптаға ғана жететінін мәлімдеді. Сарапшылардың пікірінше, авиакеросин тапшылығы Ормуз бұғазы арқылы мұнай жеткізілімдерінің шектелуімен және өңірдегі әскери қақтығыстармен байланысты.
