Әлемде жанармай тапшылығына байланысты мыңдаған әуе рейсі тоқтатылып жатыр
Әлем бойынша әуе компаниялары мамыр айына жоспарланған шамамен 13 мың рейсті тоқтатып, жолаушыларға арналған 2 миллионға жуық орынды кестеден алып тастады.
Астана, NEGE. Бұған себеп – Иран төңірегіндегі қақтығыс пен Ормуз бұғазы арқылы тасымалдау мәселелеріне байланысты авиаотын бағасының күрт өсуі.
Turkish Airlines, Lufthansa, British Airways және KLM компаниялары рейстерін қысқартатынын мәлімдеді.
Өткен аптада Қазақстанның Энергетика және Көлік министрліктері елде авиаотын тапшылығы жоқ екенін мәлімдеді. Ведомстволардың мәліметінше, ішкі өндіріс сұранысты толық қамтамасыз етеді, ал қор шамамен 150 мың тоннадай.
Мұнай тасымалдау және өңдеу департаментінің директоры Дәулет Арықбаевтың мәліметінше, ел ішінде жылына 750 мың тонна авиаотын өндіріледі, ал қажеттілік – 1,2 млн тонна.
«Ішкі нарықтағы рейстер қазақстандық авиаотынмен толықтай қамтамасыз етіледі. Қор жеткілікті. Қазіргі таңда ел бойынша шамамен 150 мың тонна қор бар», – деді ол NEGE журналисінің сұрағына жауап беріп.
Көлік вице-министрі рейстерді қысқарту мәселесі күн тәртібінде жоқ екенін, керісінше жаңа бағыттар ашу жоспарланып отырғанын мәлімдеді.
