Александр Бублик Париж мастерс турнирінің үшінші айналымына шықты
Қазақстанның бірінші, әлемнің 33-ракеткасы Александр Бублик Париж мастерс турнирінің үшінші айналымына шықты, деп хабарлайды Kazinform.
Алматы, NEGE. Қазақстандық теннисші екінші айналымда әлемнің 20-ракеткасы, Чили өкілі Николас Харримен шеберлік байқасты.
Александр Бублик қос тай-брейкте 7:6 (7:3), 7:6 (7:3) есебімен басым түсті.
Екі сағатқа жуық уақытқа созылған тартысты бәсекеде қазақстандық спортшы 10 эйс жасағанымен, 6 брейк-пойнтты өз пайдасына шеше алған жоқ. Есесіне тай-брейкте сәтті ойнады. Чилилік теннисші 6 эйспен (4 брейк-пойнт) шектелді.
Бірінші айналымда А.Бублик әлемнің 14-ракеткасы, америкалық Фрэнсис Тиафоны жолдан тайдырған еді.
Александр Бублик ширек финалға шығу үшін әлемнің 3-ракеткасы, ресейлік Даниил Медведев немесе рейтингте 17-орындағы болгариялық Григор Димитровтың біреуімен таласады.
