Александр Шевченко АҚШ-тағы турнирде камбэкпен финалға шықты
Қазақстанның екінші, әлемнің 102-ракеткасы Александр Шевченко Самтер (АҚШ) челленджер турнирінің финалына өтті.
Алматы, NEGE. Қазақстандық теннисші жартылай финалда әлемнің 120-ракеткасы, жапониялық Шинтаро Мочизукимен шеберлік байқасты.
Бірінші партияда жапониялық теннисші сәтті ойнады – 6:4. Бұдан кейін Шевченко камбэк жасай білді – 6:1, 6:1.
Бір сағат 57 минутқа созылған матчта Шевченко 2 эйспен бірге 21 брейк-пойнттың тоғызын мүлт жібермеді. Мочизуки 3 эйс, 5 брейкпен (9 брейк-пойнт) ерекшеленді.
Александр Шевченко финалда әлемнің 74-ракеткасы, италиялық Маттиа Белуччимен чемпиондық атақты сарапқа салады. Ол жартылай финалда рейтингіде 124-орындағы португалиялық Джейми Фарияны жолдан тайдырды – 6:0, 6:4.
Шевченко қазіргі кезде ATP Live рейтингісінде 89-орынға көтеріліп тұр.