Александр Лукашенко Қасым-Жомарт Тоқаевты туған күнімен құттықтады
Беларусь Президенті Александр Лукашенко Қазақстан Президенті Қасым-Жомарт Тоқаевты туған күнімен құттықтап, жеделхат жолдады, деп хабарлайды Беларусь басшысының баспасөз қызметі.
Жеделхатта Лукашенко Тоқаевтың білікті басшылығының арқасында Қазақстанда тұрақты экономикалық өсім мен саяси жаңғыру жүріп жатқанын атап өтті:
«Бүгінгі таңда сіздің білікті басшылығыңыздың арқасында дос мемлекет — Қазақстан тұрақты экономикалық өсім мен саяси жүйені кешенді жаңғырту бағытындағы жұмысты жемісті атқарып жатыр. Одан бөлек, жаһандық күн тәртібіндегі мәселелерде Астананың үлесі артып келе жатқанын көріп отырмыз», — делінген құттықтауда.
Сонымен қатар, Минск ресми түрде екі ел арасындағы достық пен өзара сенімге негізделген тату қарым-қатынасты жоғары бағалайтынын және бұл байланысты одан әрі нығайтуға ерекше мән беретінін атап өтті.
«Қазақстан мен Беларусьтің көпформатты қарым-қатынасына тән өзара сенім мен теңдік қағидаты екіжақты әріптестік іргетасын бұдан да берік қыла түседі деп сенемін», — деді Лукашенко.
Еске сала кетейік, бұған дейін Ресей Президенті Владимир Путин де Мемлекет басшысын туған күнімен құттықтаған болатын.