Алаш қайраткері Мұхаметжан Тынышпаевтың ұлы қайтыс болды
Қазақтың көрнекті саяси және қоғам қайраткері Мұхаметжан Тынышбайұлының ұлы, техника ғылымдарының докторы Дәулет Шейх-Әли-Тынышпаев өмірден өтті. Қаралы хабарды баспагер әрі қоғам белсендісі Бақытжан Бұқарбай жеткізді.
Алматы, NEGE. "Алаштың арысы Мұхаметжан Тынышбайұлының туған ұлы, техника ғылымдарының докторы Дәулет Шейх-Әли-Тынышпаев (1931-2024) екі күн бұрын АҚШ-та дүниеден озды деген суық хабар келді. Атамыздың туысқандарына қайғырып көңіл айтамыз", – деп жазды ол.
Дәулет Тынышпаев 1964 жылы Мәскеу мұнай-химия және газ өнеркәсібі институтында "Мұнай және газ кен орындарын игеру" мамандығы бойынша кандидатық диссертациясын қорғады. Сол жылы ол Уфа қаласындағы НИИ мұнайының зертханасын басқарды. 1983 жылы магматикалық құрамдардың жерасты қасиеттерін зерттеу бойынша ғылыми-зерттеу бөлімін құрды және оны 2001 жылға дейін басқарды. Бұл жерде жүргізілген ғылыми-зерттеу жұмыстары геологиялық іздеу, мұнай және газ өндіру, кен орындарына арналды. 150-ден астам ғылыми жұмыстар жазған.
