Әл-Фарабидегі жол апаты: Алматыда полиция экс-басшысы жүргізушісінің соты басталды
Алматыда қалалық полиция департаменті бастығының бұрынғы орынбасары Ержан Ұзабаевтың жүргізушісі Әсет Жақсылықовқа қатысты сот процесі басталды.
Астана, NEGE. Ол қызметте әрекетсіздікке жол берді деп айыпталып отыр, деп хабарлайды «31 арна». Тергеу нұсқасына сәйкес, бұл әрекетсіздік әл-Фараби даңғылындағы үш адамның өліміне әкеп соқтырған жол апатына себеп болуы мүмкін.
Алғашқы берген жауабында жол апаты болған түні жүргізуші Әсет Жақсылықов пен тергеу нұсқасы бойынша жол-көлік оқиғасына кінәлі деп танылған Александр Пак екеуі бірін-бірі кезек-кезек басып озғаны айтылған.
Полиция департаменті бастығының бұрынғы орынбасары Ержан Ұзабаевтың айтуынша, сол күні күдікті оны қызметтік тапсырмамен алып жүрген, кейін үйіне жеткізіп, көлікті автокөлік шаруашылығына апаруы тиіс болған.
Сондай-ақ Ержан Ұзабаев Александр Пакпен жеке таныс емес екенін, оны тек сырттай білетінін және шетелде кездесіп қалғанын айтты. Бұған қоса ол бұрынғы жүргізушісіне оң мінездеме берді.
Еске салсақ, жантүршігерлік жол-көлік оқиғасы 21 наурызға қараған түні Алматының әл-Фараби даңғылында болған. Апат салдарынан үш адам – Mercedes көлігінің жүргізушісі мен екі жолаушы қыз қаза тапты. Тергеу мәліметінше, Пак басқарған Zeekr көлігі қарсы бағыттағы жолаққа шығып кетіп, Mercedes-пен соқтығысқан.
Жол-көлік апаты бойынша айыпталған Александр Пакке 22 маусымда үкім шықты. Сот оған 10 жыл мерзімге бас бостандығынан айыру жазасын тағайындады.
Ал Ұзабаевтың жүргізушісіне қатысты бұған дейін Қылмыстық кодекстің 362-бабы – «Билікті немесе лауазымдық өкілеттіктерді асыра пайдалану» бойынша сотқа дейінгі тергеу жүргізілген. Оған тыйым салынған сериядағы мемлекеттік нөмірді заңсыз берген деген айып тағылған. Алайда 3 маусымда қылмыстық құқықбұзушылық құрамының болмауына байланысты іс тоқтатылған болатын.