Еліміздің еңбек сіңірген әртісі Ақжол Мейірбеков өмірден озды
Қазақ өнерінің қабырғасын қайыстырған хабарды белгілі әнші Сәкен Майғазиев инстаграм-парақшасында жазды.
Алматы, NEGE. «Ақжол Мейірбеков ағамыз Раббысына қайтыпты. Мейірімі шексіз, құдіреті күшті Алла тағала фирдаус жәннатты нәсіп етсін. Өте жақсы адам еді», – деп жазды әнші өз парақшасында.
Ақжол Мейірбеков 1950 жылы 7 шілдеде Оңтүстік Қазақстан облысы Арыс қаласында дүниеге келген. 1978 жылы «Дос-Мұқасан» ансамбліне қабылданса, 1985-1994 жылдары Алматы облыстық филармониясының «Арқас», «Сазген», «Адырна» ансамбльдерінде ән салған. Әнші 1994-1996 жылдары «Гүлдер» ансамблінің көркемдік жетекшісі әрі директоры болды.
Ал 2001 жылы «Ақжол» ән-театрын құрды. Музыкант 2010 жылы қайтадан «Дос-Мұқасан» тобына оралып, осы күнге дейін ансамблдің әншісі болды.Ол Қазақстанның еңбек сіңірген әртісі, құрмет орденінің иегері және ерен еңбегі үшін медалінің иегері атағына ие.
