Ақтөбедегі өрт кезінде 44 адам эвакуацияланды
Бүгін сағат 13:22-де 101 пультіне Ақтөбе қаласының Жаманқұлов көшесіндегі бес қабатты тұрғын үйлердің бірінде өрт шыққаны туралы шақыру түсті. Бірінші қабаттағы пәтерде үй заттары өртенген, деп хабарлайды ҚазАқпарат.
Ақтөбе, NEGE. Шақыру орнына келген өрт сөндірушілер жалынды сөндіруге және тұрғындарды эвакуациялауға кірісті.
«Барлау жүргізу кезінде өрт сөндірушілердің жедел әрекеттерінің арқасында 4 адам құтқарылды. Сонымен қатар баспалдақ маршы арқылы 40 адам, оның ішінде 10 бала эвакуацияланды.
Өрт сағат 13.47-де сөндірілді. Өрт алаңы 20 шаршы метрді құрады. Зардап шеккендер жоқ, өрттің себебі анықталуда», - деп жазды ТЖМ-нан.
Өртті сөндіруге Ақтөбе облысы ТЖ департаментінің 26 өрт сөндірушісі мен 6 техникасы жұмылдырылды. Сондай-ақ, өрт орнына Апаттар медицинасы орталығы филиалының бригадасы барды.
Ақтөбе облысы ТЖД азаматтарды өрт қауіпсіздігі ережелерін сақтауға шақырады.