Ақтөбедегі 1 сынып оқушысының өлімі: Баланың әкесі жағдайдың қалай болғанын айтып берді
Ақтөбеде марқұм оқушының әкесі ит секіргенде баланың қорқып, жүрегі жарылып кеткенін айтты. Ал полиция мен білім басқармасы нақты себебін атамады, деп хабарлады Kazinform.
Алматы, NEGE. Ақтөбе өңірлік коммуникациялар қызметінде полиция, білім мен денсаулық сақтау басқармасы оқиғаның мән-жайын айтып, брифинг өткізді.
— Жедел жәрдем бригадасына қоңырау 07:39–да түсті. 103 бригадасы 5 минутта жетті. Бала үйінде, анасының қасында болды. Балада клиникалық өлім болған. 30 минут бойы барлық реанимациялық іс-шара жүргізілді. Алайда нәтиже болмай, өлімі тіркелді, — деді Ақтөбе облыстық денсаулық сақтау басқармасының бөлім басшысы Әлия Шарбақов.
Ақтөбе облыстық білім басқармасының басшысы Бұлбұл Күзембаеваның айтуынша, бала 1-сыныпта оқиды. Алдын ала хабар таратқан мектеп мұғалімі қате айтқанын, ешқандай да ит болмағанын жеткізді. Алайда баланың әкесі мән-жайды өзі түсіндіріп берді.
— Ит болды. Өздері ұстап алып кетті. Қызыл ит. Иесі бар ма, жоқ па білмейміз. Үстіне секірген, қорқып кетіп, жүрегі жарылды. Шындық сол. Осы арада көзімізбен көрдік. Мамасы артынан шығып келе жатты. Қасында апасы да болды, — деді марқұмның әкесі.
