Ақтөбеде мұздай қаруланған ер адам ұсталды
Ақтөбе тұрғынының көлігінен қару-жарақтың бірнеше түрі тәркіленді, деп хабарлайды Polisia.kz.
Алматы, NEGE. Полиция қызметкерлері жедел іс-шаралар өткізу кезінде Жаңақоныс кенті маңында ресейлік есептегі көлікпен жүрген 18 жастағы жүргізушіні тоқтатты. Көліктің салонында 25 жастағы екі жолаушы болған.
Автокөлікті тексеру кезінде полиция қызметкерлері ИЖ маркалы екі ұңғылы шолақ аңшы мылтығын және ИЖ маркалы екі тегіс ұңғылы мылтықты, 16 калибрлі алты патрон мен екі пышақты тәркіледі.
Сонымен қатар жүргізушінің есірткілік масаң күйде болғаны анықталды. Көлік арнайы тұраққа қойылды.
Аталған факті негізінде Қылмыстық кодекстің 287-бабы 3-бөлігі (Қаруды, оқ-дәрілерді заңсыз сатып алу, беру, өткізу, сақтау, тасымалдау немесе алып жүру) бойынша сотқа дейінгі тергеу басталды.
Полицейлер азаматтарға не үшін сонша қару керек екенін анықтап жатыр.
Осы баптың санкциясы бес мың айлық есептiк көрсеткiшке дейiнгi мөлшерде айыппұл салуға не сол мөлшерде түзеу жұмыстарына не бес жылға дейiнгi мерзiмге бас бостандығын шектеуге не сол мерзiмге бас бостандығынан айыру жазасын көздейді.